ഓർമ്മക്കൂട്ടം

ഓർമകൾ ഉറുമ്പുകളെപ്പോലെയാണ്

ചോണനുറുമ്പു പോലെ

കടിച്ചു നോവിക്കാതെ

മേനിയാകെ പടർന്ന് അസ്വസ്ഥമാക്കുന്നവ;

കട്ടുറുമ്പു പോലെ അരിച്ചുവന്ന്

കടിച്ചു കുടയുന്നവ;

പുളിയുറുമ്പു പോലെ

ഇറുകിക്കൂടി പോകാൻ മടിക്കുന്നവ;

പറിച്ചെറിഞ്ഞിട്ടും

നീറ്റൽ ബാക്കിയാക്കി നോവിക്കുന്നവ;

മധുരമായ നിമിഷങ്ങളെ ചുറ്റിപ്പറ്റി,
കുഞ്ഞുറുമ്പുകൾപോലെ 

പോകാൻ മടിച്ചു നിൽക്കുന്നവ.

ഉറുമ്പിൻ കൂട്ടം പോലെ

അരിച്ചു വരുന്നുണ്ട്

പല പല ഓർമകൾ